Հարգելի՛ հայրենակիցներ, դեկտեմբերի 27-ի երեկոյան բոլորիդ սիրով հրավիրում ենք «Գառնի» պատմամշակութային արգելոց-թանգարան, որտեղ կվառվեն ամանորյա լույսերը։ Երեկոյան յուրօրինակ լուսավորությունից բացի, զարդարված կլինի նաև ճեմուղին։ Ամանորյա գեղեցիկ լուսանկարներ ստանալու համար կգտնեք հատուկ նախատեսված անկյուն՝ Գառնիի ֆոնին:
Արգելոց-թանգարանի տոնական լույսերը վառ կլինեն մինչև հունվարի 15-ը։
Ռուսաստանի Դաշնության Կազան քաղաքում անցկացվող ՅՈՒՆԵՍԿՕ-ի մշակութային և բնական համաշխարհային ժառանգության պահպանության կոնվենցիայի 50-ամյակին նվիրված համաժողովին մասնակցել են՝ ՀՀ ԿԳՄՍ նախարարության «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի և «Էրեբունի պատմահնագիտական արգելոց-թանգարանի» մասնագետները։
ՀՀ ԿԳՄՍՆ «Պատմամշակութային արգելոց թանգարանների և պատմական միջավայրի պահպանության ծառայություն» ՊՈԱԿ-ի, ՊՄՊ Գեղարքունիքի մարզային ծառայության և ՀՀ ոստիկանության Գեղարքունիքի մարզային վարչության նախաձեռնությամբ ապամոնտաժվել է ՀՀ Գեղարքունիքի մարզի պատմության և մշակույթի անշարժ հուշարձանների պետական ցուցակի՝ Հայրավանք բնակավայրում հաշվառված, հանրապետական նշանակության «Հայրավանք» վանական համալիր տանող ճեմուղու աջակողմյան հատվածում գտնվող տնակը։ Համայնքի բնակիչը ենթարկվել է վարչական պատասխանատվության և սեփական միջոցներով դուրս է բերել տնակը նշված տարածքից։
ՀՀ ԿԳՄՍ նախարարության «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի՝ Պատմական միջավայրի պահպանության (ՊՄՊ) Արարատի մարզային ծառայության աշխատակիցները «Խաչքարերին նոր կյանք» ծրագրի շրջանակներում ուղղել և հողաշերտից մաքրել են Լուսաշող համայնքի «Մոշաղբյուր» հին գյուղատեղիի մեծ գերեզմանոցում գտնվող երեք խաչքար:
ՀՀ ԿԳՄՍՆ «Պատմամշակութային արգելոց թանգարանների և պատմական միջավայրի պահպանության ծառայություն» ՊՈԱԿ-ի ջանքերով Շիրակի մարզի Գուսանագյուղի «դղյակ- ամրոցի» տարածքում եռալեզու տեղեկատվական վահանակ է տեղադրվել: Դղյակ-ամրոցը թվագրվում է 10-12-րդ դարերով: Այն ուղղանկյունաձև հատակագծով եռահարկ կառույց է՝ փայտյա միջհարկային ծածկերով: Ըստ Թորոս Թորամանյանի ավերակ բերդի տեղում եղել է ընդարձակ ամրոց՝ կիկլոպյան մեծ որձաքարերով, անշաղախ շարված հսկա պատերով: Այժմ հուշարձանը գտնվում է կիսավեր վիճակում:
Հայ ժողովրդի կենցաղում մեծ տարածում ունեին կարպետագործ տարբեր իրերը՝ խուրջինները, աղաքսակները, անկողնապարկերը և ձիու ծածկոցները։ «Պահպանության ծառայություն» ՊՈԱԿ-ի գործվածքի հավաքածույում ներկայացված են դրանց մի քանի տասնյակ օրինակներ, որոնցից արժանի է ուշադրության ձիու ծածկոցը։ Այն քառակուսի կարպետ է, որը երկու կողմերից ունի երկարավուն հավելվածներ, որոնք մեր օրինակում հիմքից անջատված են։ Ձիու ծածկոցը գործված է շուլալ կար տեխնիկայով․ հիմքը սպիտակ բամբակյա թելից է, զարդանախշված է բազմագույն բրդյա թելերով արված կենդանական, բուսական և երկրաչափական պատկերներով։
ԿԳՄՍՆ «Պատմամշակութային արգելոց թանգարանների և պատմական միջավայրի պահպանության ծառայություն» ՊՈԱԿ-ի՝ ՊՄՊ Վայոց ձորի մարզային ծառայության և Եղեգնաձորի գեղարվեստի դպրոցի գործակցությամբ կայացավ «Հուշարձանները ապագա արվեստագետների աչքերով» խորագիրը կրող ցուցահանդես, որտեղ ներկայացվեց դպրոցի շնորհաշատ սաների աշխատանքները։
