• 115

«Զվարթնոց» պատմամշակութային հնավայր-թանգարանում բացվել է «ՆԱ. կենցաղից արվեստ» խորագրով ցուցադրություն

Ցուցադրությունը բացվել է Թանգարանների միջազգային օրվան նվիրված միջոցառումների շրջանակում։

Ցուցադրության առանցքում ՆԱ է՝ կինը՝ որպես «արարող»։ Ցուցադրությունը նպատակ ունի  ներկայացնել կնոջ դերը հայկական ձեռագործության ավանդույթներում՝ որպես նյութական մշակույթի ձևավորման, պահպանման և փոխանցման առանցքային դերակատար։ Կանանց ձեռագործ աշխատանքը դիտարկվում և ներկայացվում է  որպես ինքնության, գեղագիտական ընկալումների և մշակութային հիշողության փոխանցման միջոց, որ սերդեսերունդ ձևավորել է համայնքային և ազգային մշակութային ավանդույթներ։



Ցուցադրության կառուցվածքը հիմնված է միջավայրի վերարտադրության սկզբունքի վրա։ Գուրոսի հին լուսանկարները (որոնց սևանկարները նույնպես պահվում են մեր ֆոնդերում) օգտագործվում են որպես վիզուալ և պատմական աղբյուրներ, որոնք փաստագրում են կանանց արտադրական-ստեղծագործական գործունեությունը։



Այս լուսանկարները ձևավորում են ցուցադրության տարածական և թեմատիկ միջավայրը, իսկ ֆոնդային առարկաները՝ աշխատանքային գործիքները, գործվածքները և ձեռագործ աշխատանքները տեղադրվում են՝ որպես այդ միջավայրի նյութական շարունակություն՝ ստեղծելով լուսանկարչական պատկերների և իրական առարկաների  յուրօրինակ փոխհարաբերություն։



Ցուցադրությունն ամբողջանում է ժամանակակից տեխնոլոգիաների կիրառմամբ ստացված անիմացիան, ինչի արդյունքում  լուսանկարները «կենդանանում են»։ 



Երեկոյի երաժշտական հյուրը Երևանի պետական կոնսերվատորիայի «Կոմիտաս» ուսանողական երգչախումբն էր։ 



Ցուցադրությունը բաց կլինի մինչև հուլիսի վերջ։