127
«Խաչքարերին նոր կյանք» ծրագիրը՝ Լոռու, Վայոց Ձորի և Արարատի մարզերում
Այսօր 00:00
«Խաչքարերին նոր կյանք» ծրագիրը՝ Լոռու, Վայոց Ձորի և Արարատի մարզերում
Հայկական պատմամշակութային և հոգևոր ժառանգության պահպանությանն ուղղված «Խաչքարերին նոր կյանք» ծրագիրը շարունակում է իր առաքելությունը։«Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի մարզային ծառայության աշխատակիցները Հայաստանի տարբեր անկյուններում՝ հողի շերտերից, մոռացությունից և խոնարհված վիճակից փրկել, վերականգնել և իրենց պատվանդաններին են վերադարձրել արժեքավոր խաչքարեր։
Լոռու մարզում Թումանյան համայնքի Դսեղ բնակավայրի Սբ․ Գրիգոր Բարձրաքաշ վանական համալիրում մասնագետները ուղղել և միավորել են եկեղեցու խորանի մոտ ընկած կոտրված խաչքարը:
Գյուլագարակ համայնքի Վարդաբլուր վարչական տարածքում գտնվող Սուրբ Աստվածածին եկեղեցու՝ գերեզմանոցի պահպանական գոտում, աշխատակիցները իրականացրել են բարդ վերականգնման աշխատանքներ. տեխնիկայի միջոցով զգուշությամբ հողից հանել, ուղղել և պատվանդանին են տեղադրել գետնին ընկած, երկու մասի բաժանված խաչքարը՝ վերականգնելով նախկին ամբողջական տեսքը:
Վայոց Ձորի մարզում՝ Վայք համայնքի Հերհեր բնակավայրի «Գուտենի» տեղանքում ՊՄՊ մարզային ծառայության աշխատակիցները կատարել են ընկած և կիսագետնաթաղ խաչքարերի կանգնեցման աշխատանքներ՝ դրանք զերծ պահելով հետագա վնասումից:
Արարատի մարզում՝ Խոսրովի պետական անտառի տարածքում գտնվող «Գյոլասոր» գյուղատեղիի գերեզմանոցում, ՊՄՊ մարզային ծառայության աշխատակիցները հողային շերտից մաքրել, ուղղել և ամրակայել են տեղում հաշվառված 4 խաչքարերը:
Յուրաքանչյուր նման նախաձեռնություն քայլ է՝ ուղղված մեր հարուստ քարեղեն տարեգրության փրկությանը։
